Spá N1-deildar karla: FH ver titilinn

Samkvæmt árlegri spá fyrirliða og forráðamanna liða í N1-deild karla verður FH Íslandsmeistari annað árið í röð. Það var tilkynnt á kynningarfundi N1-deildarinnar nú í hádeginu.

FH og Akureyri háðu spennandi rimmu um Íslandsmeistaratitilinn síðastliðið vor og höfðu FH-ingar þar betur. Akureyri varð deildarmeistari og eru aðeins fjórum stigum á eftir FH í spánni nú.

FH varð í gærkvöldi meistari meistaranna eftir sigur á Val í jöfnum leik sem réðst ekki fyrr en í vítakeppni.

HK-ingum er spáð þriðja sætið en nýliðum Aftureldingar og Gróttu spáð falli niður í 1. deildina.

Í 1. deild karla var ÍBV spáð efsta sætinu og Stjörnunni öðru. Spárnar má sjá í heild sinni hér fyrir neðan.

N1-deild karla:

1. FH 202 stig

2. Akureyri 198

3. HK 192

4.-5. Fram 162

4.-5. Haukar 162

6. Valur 159

7. Afturelding 94

8. Grótta 79

1. deild karla:

1. ÍBV 165 stig

2. Stjarnan 158

3. ÍR 138

4. Selfoss 126

5. Víkingur 125

6. Fjölnir 98