FIA sátt við nýja Formúlu 1 braut í Indlandi

Charlie Whiting, keppnisstjóri FIA í Formúlu 1 er sáttur við ástand nýrrar brautar í Delí í Indlandi, sem verður notuð í fyrsta skipti 30. október á þessu ári. Þá fer fyrsti indverski Formúlu 1 kappaksturinn fram. Brautin í Indlandi nefnist Buddh og mótshaldarar eru með 10 ára samning um Formúlu 1 mótshald á svæðinu.



Í frétt á autosport.com í dag segir Vicky Chandhok, yfirmaður akstursíþróttafélags Indlands að Whiting hafi verið hæstánægður með framgang mála og að brautin væri lengra kominn en hann hefði átt von á. FIA mun skoða brautina vikuna fyrir áætlaðan kappakstur og gefa endanlegt leyfi fyrir mótinu, þegar allt er klárt.



Tveir indverskir Formúlu 1 ökumenn hafa komið við sögu í mótum ársins. Narain Karthikeyan ók með Hispania liðinu spænska, en var látinn víkja fyrir Daniel Ricciardo, en Red Bull keypti sæti undir hann hjá liðinu í stað Karthikeyan. Óljóst er hvort hann fær hugsanlega tækifæri til að keyra í mótinu í Indlandi. Sama má segja um Karun Chandhok, sem er varaökumaður Lotus. Hann hefur þegar fengið tækifæri í einu móti á þessu ári í stað Jarno Trulli.