Ljósaskiptin gefa best í Kleifarvatni

Ljósaskiptin eru oft mjög skemmtilegur tími í veiði, en þá er eins og eitthvað spennuþrungið andrúmsloft taki völdin því mjög algent er að þá komi urriðinn að landi í ætisleit.

Það má nefna vötn eins og Þingvallavatn, Úlfljótsvatn, Baulárvalla- og Hraunsfjarðarvatn, vötnin í Svínadal og Kleifarvatn sem henta sérstaklega til veiða í ljósaskiptunum.  Þá er gott að veiða alveg inn í myrkur og er þá ekki verra að hafa vasa- eða höfuðljós meðferðis ef að það þarf að skipta um flugur eða bara til að ganga frá græjunum.

Jón Skelfir fór ásamt félögum sínum, bræðrunum Óskari og Geira, eina kvöldstund í Kleifarvatn.  Það var ekki fyrr en í ljósaskiptunum sem að hlutirnir fóru að gerast.  Þeir veiddu á flugu og voru helst að fá hann á Peacock, Montana (rauða) og Pheasant tail - allar með kúluhaus.  Þeir voru sunnanmegin í vatninu.  Við fengum senda myndina hér fyrir neðan af þeim bræðrum Óskari og Geira.  Einnig fylgi með skjámynd af kortavefnum á www.ja.is af Kleifarvatni og þar var gaman að sjá hyldýpið sem umlykur tangann sem gengur út frá Lambhaganum norðanmegin.

Birt með góðfúslegu leyfi Veiðikortsins