Margrét Lára með stórleik gegn Umeå

Margrét Lára Viðarsdóttir skoraði bæði mörk Kristianstad í 2-1 sigri liðsins á sterku liði Umeå í sænsku úrvalsdeildinni í knattspyrnu.

Umeå komst yfir strax á fjórðu mínútu leiksins en Margrét Lára skoraði mörkin sín á 42. og 50. mínútu og tryggði þar með Kristianstad góðan sigur.

Henni var svo skipt af velli á 78. mínútu en þær Sif Atladóttir, Erla Steina Arnardóttir og Guðný Björk Óðinsdóttir léku allan leikinn í vörn Kristianstad. Elísabet Gunnarsdóttir er þjálfari liðsins.

Umeå er búið að vera í harðri titilbaráttu við ríkjandi meistara Malmö í sumar en tapaði í dag dýrmætum stigum í þeirri baráttu. Liðið er með 31 stig, þremur á eftir Malmö sem vann sinn leik í gær.

Kristianstad er í sjötta sætinu með 24 stig.