Dóra María lagði upp mark í sigri Djurgården

Dóra María Lárusdóttir lagði upp mark og Guðbjörg Gunnarsdóttir hélt hreinu þegar Djurgården vann 2-0 útisigur á Piteå IF í sænska kvennafótboltanum í dag.

Katrín Jónsdóttir lék allan leikinn eins og þær Guðbjörg og Dóra María. Dóra María lagði upp seinna markið fyrir Miu Jalkerud sem kom á 37. mínútu en Emma Lund hafði komið Djurgården í 1-0 tíu mínútum áður.

Sigur Djurgården var mikilvægur en liðið hefur nú fjarlægst fallbaráttuna með tveimur 2-0 sigrum í röð, fyrst á Kristianstad og svo á Piteå í dag. Djurgården er nú í 8. sæti deildarinnar níu stigum frá fallsæti.