Guðmundur og Ólafur í 4. sæti á EM - Ísland mætir Noregi í dag

Íslenska karlalandsliðið í golfi mætir Norðmönnum í dag í fyrstu umferð í B-riðli á Evrópumeistaramóti áhugakylfinga sem fram fer í Portúgal. Íslendingar enduðu í 10. sæti eftir höggleikinn sem fram fór fyrstu tvo keppnisdagana. Samtals lék íslenska liðið á 2 höggum undir pari en Guðmundur Ágúst Kristjánsson úr GR fór á kostum í gær þegar hann lék á 5 höggum undir pari eða 67 höggum. Guðmundur og Ólafur Björn Loftsson deildu fjórða sætinu í einstaklingskeppninni á samtals -6 höggum undir pari.

Scott Fernandez frá Spáni lék best allra í höggleiknum eða -9 (66-69), landi hans Adrian Otaeque varð annar á -7 (67-70) og Thomas Pieters frá Belgíu lék einnig á -7 (70-67).

Axel Bóasson úr GK lék einnig undir pari í gær eða á 71 höggi, -1. Ólafur Loftsson úr Nesklúbbnum lék á pari eða 72 höggum. Alfreð Brynjar Kristinsson (GKG), Arnar Snær Hákonarson (GR) og Guðjón Henning Hilmarsson (GKG) léku allir á +4 eða 76 höggum. 

Liðinum 20 var raðað í þrjá riðla eftir skori eftir höggleikskeppnina. Átta efstu þjóðirnar leika í A-riðli, 9-16 í B-riðli og 17-20 í C-riðli. Þær þjóðir sem enda í 13 efstu sætunum halda keppnisrétti sínum á Evrópumeistaramótinu.

Lokastaðan eftir höggleikinn:

A-riðill:

1. Spánn -24

2. Þýskaland -20

3. Frakkland -18

4. Finnland -12

5. Sviss -12

6. Írland -12

7. Skotland -12

8. Svíþjóð -12

B-riðill

9. England -4

10. Ísland -2

11. Austurríki -1

12. Holland -1

13. Danmörk par

14. Ítalía +2

15. Noregur +7

16. Wales +10

C-riðill

17. Portúgal +10

18. Belgía +17

19. Slóvakía +19

20. Rússland +61