Mcllroy með átta högga forskot fyrir lokahringinn

Norður-Írinn Rory Mcllroy er með átta högga forskot á Opna bandaríska meistaramótinu í golfi sem fram fer á Congressional-vellinum í Bethesda í Maryland-ríki. Mcllroy spilaði þriðja hringinn í dag á þremur höggum undir pari.

Næstur á eftir Mcllroy er Suður-Kóreu maðurinn Y. E. Yang á sex höggum undir pari. Englendingurinn Lee Westwood, Bandaríkjamaðurinn Robert Garrigus og Ástralinn Jason Day deila svo þriðja sætinu á fimm höggum undir pari.

Norður-Írinn, sem er nýorðinn tuttugu og tveggja ára, hefur farið á kostum á mótinu. Fyrsta hringinn spilaði hann á sex höggum undir pari, þann annan á fimm höggum undir og í dag á þremur höggum undir. Hann hefur aðeins tvisvar spilað holu yfir pari á hringjunum þremur. 

Hann hefur þegar skráð nafn sitt í sögubækurnar. Enginn annar í sögu mótsins hefur á einhverjum tímapunkti verið 13 höggum undir pari. Hann spilaði fyrstu 36 holurnar á ellefu undir pari sem einnig er mótsmet.

Mikil pressa er á Norður-Íranum fyrir lokahringinn. Á Masters mótinu á Augusta í Georgíu í apríl var Mcllroy sjóðandi heitur fyrstu þrjá dagana og virtist fátt geta stöðvað hann líkt og nú.

Á fyrsta degi spilaði hann besta hring nýliða í sögu mótsins. Á lokahringnum setti hann hins vegar ekki jafn eftirsóknarvert met. Versti hringur kylfings sem hefur leitt mótið að loknum þriðja degi en hann spilaði á átta höggum yfir pari. Mcllroy þurfti að sjá á eftir þeim titli.

Það verður fróðlegt að sjá hvernig Mcllroy höndlar pressuna á lokadeginum. Fylgst verður með gangi mála hér á Vísi á morgun.

Þá má fylgjast með holu-fyrir-holu uppfærslu á heimasíðu mótsins með því að smella hér.