Palacios á leið til Ítalíu

Wilson Palacios segir að viðræður séu komnar langt á veg á milli Tottenham og Napoli um kaup síðarnefnda félagsins á sér.

Palacios kom til Tottenham fyrir tveimur árum síðan fyrir tólf milljónir punda en talið er að Napoli hafi boðið tíu milljónir í kappann.

„Næstu dagar munu hafa mikið að segja um mína framtíð,“ sagði hann við fréttamenn í Bandaríkjunum þar sem hann er að undirbúa sig fyrir Gold Cup-mótið með landsliði Hondúras.

„Viðræður eru langt komar en ég er að bíða eftir fréttum frá London.“

Ólíklegt þykir að Tottenham sé reiðubúið að selja Palacios á minna verði en það keypti hann á fyrir tveimur árum.