Kovalainen telur mótið í Kanda einn af hápunktum keppnistímabilsins

Heikki Kovalainen hjá Lotus liðinu telur að Formúlu 1 mótið í Kanada sé einn af hápunktum keppnistímabilsins, en keppt verður í Montreal um næstu helgi. Liðsfélagi hans Jarno Trulli segist alltaf hafa verið óheppinni á mótssvæðinu í Montreal.

„Kanada er einn af hápunktum keppnistímabilsins og ég veit að það er tilhlökkun hjá öllum í liðinu. Það er ekki sama atið og í Mónakó þegar maður er ekki á brautinni, en borgin iðar öll þegar við erum á svæðinu. Það er stutt við bakið á mótshaldinu alls staðar í borginni og stemmningin því mögnuð", sagði Kovalainen í fréttatilkynningu frá Lotus.

„Brautin er gott viðfangsefni. Reynir mikið á bremsur og maður verður að vera nákvæmur á bremsuköflunum til að ná góðum hring. Það er líka atriði að nota kantana eins mikið og hægt er til að vinna sér inn tíma. Það er atriði á æfingum að stilla bílnum upp fyrir þennan þátt."

Kovalainen sagði að hann hefði ekki getað náð út úr bílnum því sem til staðar í honum í Mónakó, en hann telur liðið hafa meiri upplýsingar eftir mótið til að hámarka möguleikanna í Kanada. Liðsfélagi hans Jarno Trulli kvaðst hafa notið sín í Mónakó og telur liðið á réttri leið.

„Ég elska Kanada og sérstaklega Montreal. Brautin er frábær, reynir á og heimamenn taka vel á móti okkur og borgin er góð blanda af Evrópu og Norður Ameríku. Mótið sjálft hefur allt reynst mér þrautin þyngri. Ég hef alltaf verið óheppinn, en ég komst ekki í mark í fyrra og þessu vil ég breyta í ár."

Trulli segir mikilvægt að gera ekki mistök, þar sem veggir afmarka brautina og hann telur brautina eina þá erfiðustu sem keppt er á.

„Það verður áhugavert að sjá hvernig menn útfæra noktun á dekkjunum um helgina og ég held að þetta verði góð keppni, vonandi fyrir okkur líka!", sagði Trulli.