Ingimundur líklega á leið til Akureyrar

Samkvæmt heimildum Vísis eru talsverðar líkur á því að landsliðsmaðurinn Ingimundur Ingimundarson gangi í raðir Akureyrar fyrir næsta tímabil. Hann hefur síðustu ár leikið með danska liðinu AaB.

Akureyringar urðu að sætta sig við tvö silfur í vetur og ætla sér stóra hluti á næstu leiktíð. Hluti af þeim áætlunum er að næla í varnarmanninn sterka sem mun væntanlega einnig leika á línunni.

Samkvæmt heimildum Vísis höfðu Akureyringar einnig áhuga á Atla Ævari Ingólfssyni, línumanni HK, en ekki verður af því að hann fari norður.

Fastlega má búast við því að fleiri leikmenn komi norður og svo er ekki loku skotið fyrir að Oddur Gretarsson taki einn vetur í viðbót með Akureyri áður en hann fer í atvinnumennsku.