Sauber með endurbættan bíl á Spáni

Sauber liðið frá Sviss mætir með verulega endurbættan bíl í Formúlu 1 mótið á Spáni um næstu helgi. Keppt verður á Katalóníu brautinni sem er nærri Barcleona. Sauber hefur náð í átta stig í fyrstu fjórum mótunum og Kamui Kobayashi náði þeim árangri að ná í stig í síðasta móti þó hann ræsti af stað úr síðsta sæti, eftir að bíll hans bilaði í tímatökunni.

Liðsfélagi Kobayashi, Sergio Perez hefur ekki náð að vinna sér inn stig á árinu, en Kobayashi hefur séð um það fyrir hönd sín og liðsins, í keppni ökumanna og bílasmiða.

"Það þekkja allir brautina í Barcelona mjög vel eftir vetraræfingarnar. Bíll okkar virtist góður þar í febrúar og mars. Um næstu mótshelgi verður mikilvægt fyrir okkur að einbeita okkur að uppsetningu bílsins í samræmi við nýju hlutina. Við verðum að nota þá til að bæta stöðu okkar í tímatöku og keppni", sagði Kobyashi um mótið um næstu helgi.

Hann segir Katalóníu brautina áhugaverða blöndu af háhraða beygjum, meðalhröðum og hægum beygjum og telur að lokahlutinn, frá tímatökusvæði tvö til endamarks geti reynst vandasamur fyrir Sauber.

"Í gegnum tíðina hefur framúrakstur verið þrautin þyngri á þessari braut, en ég tel að stillanlegur afturvængurinn muni gera mótið í ár spennandi. Ég kann vel við notkun þessa búnaðar", sagði Kobayashi, en samkvæmt nýjum reglum getur ökumaður breytt afstöðu aftuvængsins þannig að loftflæði yfir bílinn aukist til muna, svo fremi að ökumaðurinn sé sekúndu eða minna á eftir keppinaut sem taka á framúr. Kobayashi telur að búnaðurinn muni koma að góðum notum um helgina.

Perez hlakkar mjög til mótsins á Spáni, eftir heldur brösótt gengi til þessa. Hann náði þó sjöunda sæti aksturslega séð í fyrsta mótinu, en var dæmdur úr leik eins og Kobayashi þar sem liðið reyndist vera með ólöglegan afturvæng á bílum sínum.

"Ég hef verið óheppinn í síðustu mótum sen hef tilfinningu fyrir því að þetta breytist í spænska kappakstrinum og að ég nái í stig. Mér kann vel við mig á brautinni og gengur alltaf vel á henni. Við náðum ekki að sýna styrk okkar í Tyrklandi og ég vona að það breytist á Spáni og að við gerum betur í tímatökunni. Ég vona að uppfærslan á bílnum standist væntingar okkar", sagði Perez.