Liuzzi: Markmiðið að minnka bilið í forystubílanna

Ítalinn Viantonio Liuzzi hjá Formúlu 1 liði Hispania segir að lið sitt gæti komið á óvart í kappakstrinum í Tyrklandi um næstu helgi, en þá keppir hann ásamt liðsfélaga sínum Narain Karthikeyan frá Indlandi á Istanbúl Park brautinni.

„Istanbúl Park er tæknileg braut og ég nýt mín vel á henni. Ég man að árið 2006 komst ég úr 16. sæti í það sjötta með góðri ræsingu, en gat ekki fylgt því eftir, vegna bilunnar í drifbúnaði", sagði Liuzzi í fréttatilkynninu frá Hispania. Liuzzi og Karthikeyan eru að keppa á fyrsta ári með Hispania liðinu, sem byrjaði að keppa í fyrra í Formúlu 1. Liuzzi var með Force India liðinu í fyrra, en Kathikeyan hefur verið fjarri góðu gamni í mörg ár.

„Ég býst við líflegu móti og mikið af framúrakstri. Beygja átta er engu annarri lík og er sérlega erfið ef þú ert á bíl með lítið niðurtog. Þá er auðvelt að missa afturendann út og út spýtast úr aksturslínunni. Við ættum að standa betur að vígi en áður, í Tyrklandi, vegna nýrra hluta sem verða í bílnum. Hver mínúta í akstri á brautinni mun skipta okkur máli", sagði Liuzzi, en Hispania liðið náði ekki að mæta á vetraræfingar keppnisliða fyrir tímabilið.

„Markmið okkar í Tyrklandi er að staðfesta að nýjungarnar í bílnum virki og að minnka bilið í forystbílanna. Ef allt gengur samkvæmt áætlun, þá gætum við komið mörgu fólki á óvart. Með því að minnka bilið í önnur lið og sýna að við tökum þessu af alvöru", sagði Liuzzi.

Karthikeyan hefur aðeins einu sinni ekið á Istanbúl Park brautinni. Það var árið 2005 með Jordan og þá gekk hvorki né rak vegna bilunnar í bílnum hans.

„Ég á ekki góðar minningar um mótið, en minningarnar um Tyrkland sem slíkt eru frábærar. Fólkið er vingjarnlegt og maturinn stórkostlegur", sagði Karthikeyan.

„Ég vonast til að halda áfram á sama hátt og í Sjanghæ, að komast á leiðarenda. Safna þannig mikilvægum upplýsingum og færast nær því að fullnýta möguleikanna sem búa í F111 bílnum. Við erum á réttri leið, eftir fyrsta mótið okkar í Malasíu. Ég er viss að endurbætur á bílnum sem verða til staðar í Tyrklandi mun þoka okkur skrefi nær þeim liðum sem eru rétt á undan okkur", sagði Karthikeyan.