Hamilton tapaði 2 stigum vegna refsingar

Úrslitin í Formúlu 1 mótinu í Sepang brautinni í Malasíu í gær breyttust eftir að keppni lauk í gær, þar sem Lewis Hamilton og Fernando Alonso var refsað af dómurum mótsins eftir keppni. Tuttugu sekúndum var bætt við tíma þeirra og Hamilton féll niður um sæti vegna þess. Úr sjöunda í áttunda.

Báðir voru taldir hafa brotið af sér í viðureign þeirra um þriðja sætið í gær. Hamilton var talinn hafa sveigt of oft í veg fyrir Alonso þegar þeir áttust við í einum hring og Alonso var svo refsað fyrir að keyra á Hamilton hring síðar þegar hann reyndi framúrakstur. Báðir gátu haldið áfram keppni, en skipta þurfti um framvæng hjá Alonso eftir samstuðið.

„Ég vissi að ég myndi frá refsingu. Ég er ekki hissa. Ég var hjá dómurunum og vænti þessa. Ég geri alltaf ráð fyrir því versta. Ég tapaði bara sæti og mér líður ekkert verr en ella eftir atburði helgarinnar", sagði Hamilton í frétt á autosport.com.

Hann kvaðst ekki ætla að rífast yfir dómnum eða vera ósammála.

„Frá minni hlið séð, þá má ekki sveigja oftar en einu sinni. Tel ég það hættulegt? Nei, en svona er reglan. Tuttugu sekúndur eru ekki svo slæm refsing. Hvað Fernando varðar, hann ók á mig og fékk 20 sekúndna refingu, en það hafði engin áhrif. Það kemur ekki út sem refsing, en svona er kappakstur", sagði Hamilton.

Alonso tapaði ekki sæti á sinni refsingu.

„Þetta breytti ekki stöðunni og því engin dramatík. Ég náði sjötta sæti eftir sem áður og þetta var kappaksturs atvik. Ég reyndi framúrakstur, við snertumst og því miður brotnaði framvængur hjá mér og ég þurfti að taka þjónustuhlé. Ég mun reyna aftur í næsta móti", sagði Alonso um málið.

Aðspurður um hvor þeirra væri í sök vegna árekstursins sagði Alonso:

„Þetta gerist bara. Maður reynir að keppa og við snertumst. Dómarar kölluðu okkur á sinn fund og þetta er niðurstaðan. Við ákveðum ekki þessa hluti og höfum ekkert að segja um niðurstöðuna. Við reynum að keppa og njóta okkar í bílunum og vonandi ljúkum við báðir keppni næst án vandamála", sagði Alonso.

Staðan í stigakeppni ökumanna eftir úrskurð dómara breyttist þannig að Hamilton tapaði 2 stigum. Sebastian Vettel er sem fyrr með 50 stig, Jenson Button 26, Hamilton 22 og Mark Webber 22.

Rétt lokastaða í keppninni á Sepang:

1. Vettel Red Bull-Renault 1:37:39.832

2. Button McLaren-Mercedes + 3.261

3. Heidfeld Renault + 25.075

4. Webber Red Bull-Renault + 26.384

5. Massa Ferrari + 36.958

6. Alonso Ferrari + 37.248

7. Kobayashi Sauber-Ferrari + 1:07.239

8. Hamilton McLaren-Mercedes + 1.09.057

9. Schumacher Mercedes + 1:24.896

10. Di Resta Force India-Mercedes + 1:31.563