Miami Heat þurfti að hafa fyrir hlutunum gegn Philadelphia

Chris Bosh skoraði 25 stig og tók 12 fráköst í 97-89 sigri Miami Heat gegn Philadelphia í fyrstu umferð úrslitakeppni Austurdeildarinnar í NBA deildinni í körfubolta í kvöld. Sigur Miami var alls ekki auðveldur og leikmenn Philadelphia gáfu ekkert eftir á lokakaflanum. Dwyane Wade skoraði alls 17 stig fyrir Miami og þar af 5 á síðustu tveimur mínútum leiksins. LeBron James skoraði 21 stig fyrir Miami.

Miami náði ekki að skora í rúmlega 4 mínútur í fjórða leikhluta og á þeim tíma skoruðu gestirnir 12 stig og munurinn var aðeins eitt stig, 88-87. Thaddeus Young skoraði 20 stig fyrir Philadelphia, Jrue Holiday var með 19 og Elton Brand skoraði 17. Næsti leikur er á mánudaginn í Miami og það lið sem fyrr vinnur fjóra leiki kemst í undanúrslit Austurdeildar.