Manassero með stáltaugar en McIlroy brotnaði á ný

Margir eru nú farnir að efast um að Rory McIlroy geti staðið undir því álagi sem fylgir því að vera í efsta sæti á lokadegi atvinnumóts í golfi. Norður-Írinn klúðraði lokadeginum á Mastersmótinu um s.l. helgi með eftirminnilegum hætti þar sem hann var með fjögurra högga forskot fyrir lokadaginn.

Lokastaðan:

McIlroy virtist vera búinn að hrista af sér áfallið á Maybank meistaramótin í Malasíu en hann var með þriggja högga forskot þegar keppni var hálfnuð en hann lék af sér á þriðja hringnum sem hann lék á pari.

Ítalska ungstirnið Matteo Manassero var með stáltaugar þegar mest á reyndi og hann landaði sigrinum tveimur dögum fyrir 18 ára afmælisdaginn. Manassero lék samtals á -16 og er þetta annar sigur Manassero á Evrópumótaröðinni en hann lék lokahringinn á fjórum höggum undir pari.

Rory McIlroy, sem er aðeins 21 árs gamall, lék samtals á -14 sem skilaði honum í þriðja sæti en Gregory Bourdy frá Frakklandi endaði í öðru sæti á -15.