Umfjöllun: FH marði eins marks sigur gegn grönnunum

FH gulltryggði sér annað sætið í N1 deild karla í kvöld með að leggja granna sína í Haukum af velli í Kaplakrika í kvöld, 24-23, í æsispennandi leik. Leikurinn var í járnum allan tímann og en FH-ingar náðu að skora sigurmarkið þegar hálf mínúta er eftir af leiknum. Með ósigrinum er einnig ljóst að möguleikar Hauka á að komast í úrslitakeppnina er nú aðeins stjarnfræðilegir.

Jafnræði var með liðunum á upphafsmínútum leiksins. Liðin skiptust á að hafa forystuna í upphafi leik en um miðbik fyrri hálfleiks náðu gestirnir í Haukum góðum leikkafla og komust tveggja marka forystu. Freyr Brynjarsson var heitur í fyrri hálfleik fyrir Hauka og skoraði fjögur mörk úr jafnmörgum skotum. Birkir Ívar Guðmundsson var einnig heitur í marki Hauka og 10 skot í fyrri hálfleik.

FH náði góðri rispu undir lok fyrir hálfleiks og náði að jafna leikinn með góðum varnarleik. Ásbjörn Friðriksson sá til þess að heimamenn voru yfir í hálfleik, 13-12 með marki úr víti þegar leiktími í fyrrihálfleik var liðinn.

FH byrjaði síðari hálfleikinn betur og leiddi mest með tveimur mörkum um miðbik hálfleiksins. FH-ingar hefði getað náð meiri forystu ef ekki hefði verið fyrir góða innkomu hjá Sveini Þorgeirssyni í sóknarleik Hauka sem skoraði þrjú mörk í röð fyrir gestina.

Haukar höfðu frumkvæðið þegar skammt var eftir en FH-ingar náðu að jafna leikinn þegar tvær mínútur voru eftir af leiknum í stöðunni 23-23. Ólafur Guðmundsson kom FH yfir þegar um hálf mínúta var eftir af leiknum með góðu marki. Haukar reyndu hvað þeir gátu til að jafna en skot Björgvins Þórs Hólmgeirssonar fór yfir í þann mund er leiktíminn rann út.

Haukar fengu þó aukakast sem Þórður Rafn Guðmundsson framkvæmdi þegar leiktíminn var liðinn. Skot hans fór í gegnum varnarvegg FH en Pálmar Pétursson var réttur maður á réttum stað og tryggði FH góðan sigur á grönnum sínum með góðri vörslu.

Ólafur Guðmundsson var markahæstur í liði FH með 7 mörk, Ásbjörn Friðriksson með 6 mörk og Baldvin Þorsteinsson með 4 mörk. Hjá Haukum var Freyr Brynjarsson atkvæðamestur með 5 mörk en Sveinn Þorgeirsson og Heimir Óli Heimsson skoruðu fjögur mörk. Birkir Ívar Guðmundsson varð 15 skot í marki Hauka.