Bradford spilar fyrir nýfæddan son sinn í kvöld

Nick Bradford, leikmaður Grindavíkur, mun spila sinn sjöunda oddaleik á Íslandi á aðeins fimm tímabilum í kvöld er Grindavík tekur á móti Stjörnunni. Nick er gríðarlegur keppnismaður sem beitir öllum brögðum til þess að vinna og hann segist þrífast á svona leikjum.

"Ég er tilbúinn í slaginn og það eru svona slagir sem mér finnast langskemmtilegastir," sagði Bradford við Vísi í dag en það var létt hljóðið í honum.

Undirbúningur hefur staðið yfir í allan dag hjá honum og hann sagðist sækja í ræturnar fyrir leikinn eða "Old School" eins og hann kallar það á frummálinu.

"Ég fór á skotæfingu í morgun og svo er ég að hlusta mikið á tónlist. Það dugar ekkert minna en gamla efnið á svona degi og 2Pac hefur verið mikið spilaður. Það mun skila sínu í kvöld," sagði Bradford léttur.

Hann segir að Grindavíkurliðið mætti beitt til leiks í kvöld.

"Við þurfum að spila eins og lið. Megum ekki gefa auðveld skot og vera skynsamir í sókninni. Verðum líka að vera hreyfanlegri. Við höfum gert smá breytingar á vörninni okkar fyrir leikinn," sagði Bradford en mikið er látið með að Grindavík hafi ekki leikstjórnanda.

"Við ætlum að mæta því þannig að það verður ekki vandamál. Við erum með lausnir og ég held að þetta verði ekki vandamál."

Bradford varð faðir eftir að hann kom til Íslands er unnusta hans fæddi dreng sem á enn eftir að hitta föður sinn. Bradford segir að vissulega sé erfitt að vera fjarverandi á slíkri stund en hann segist eiga óklárað verkefni á Íslandi áður en hann hittir soninn.

"Drengurinn fæddist 14. mars og kom óvænt enda fæddist hann fimm vikum fyrir tímann. Ég er að spila fyrir soninn og hann verður í huga mér í leiknum. Hann veitir mér örugglega styrk til þess að hjálpa Grindavíkurliðinu að komast lengra.

"Ég held að þetta lið geti farið mun lengra en við ætlum samt að taka eitt skref í einu."