Birna kemst aftur í skóna og verður með Keflavík á morgun

Birna Valgarðsdóttir, fyrirliði kvennaliðs Keflavíkur, verður með liðinu í fyrsta leik undanúrslitaeinvígsins á móti KR á morgun. Birna hafði misst af síðustu þremur leikjum Keflavíkur eftir að hún meiddist í bikarúrslitaleiknum á móti KR.

Birna kláraði bikarúrslitaleikinn þrátt fyrir meiðslin og var valin maður leiksins. Hún verður með í fyrsta sinn á morgun eftir að hafa verið frá keppni í 28 daga.

„Ég er öll að koma til og ristin er að verða góð. Ég fékk sprautu hjá Gauta og þetta er búið að hjaðna og lagast. Ristin er að verða fín," sagði Birna í samtali við Vísi.

Það er óhætt að segja að Keflavíkurliðið hafi saknað Birnu því liðið hefur tapað tveimur síðustu leikjum sínum eftir að hafa unnið fyrsta leikinn án hennar á flautukörfu.

Birna hefði alveg treyst sér til þess að spila en það var einn hængur þar á.

„Ég gat ekki reimt á mig körfuboltaskóna því ég komst ekki ofan í skóinn. Annars hefði ég spilað með," sagði Birna í léttum tón en hún er þekkt fyrir að spila í gegnum ýmis meiðsli enda mikið hörkutól.

„Ég verð með á morgun. Það þýðir ekkert annað," sagði Birna að lokum.

Birna er að reyna að vinna sinn sjötta Íslandsmeistaratitil á ferlinum en hún hefur átt mjög gott tímabil þar sem hún er með 15,8 stig, 5,2 fráköst og 3,6 stoðsendingar að meðaltali í leik.