Massa telur ekki hægt bera keppinautanna saman

Felipe Massa hjá Ferrari náði besta aksturstímanum á Barcelona brautinni í gær og besta tímanum sem náðist á fjögurra daga æfingum Formúlu 1 liða á brautinni, sem lauk í gær. En fyrsti æfingadagurinn var á föstudag og einnig var ekið um helgina. Massa sagði eftir æfinguna í gær, samkvæmt frétt á espnf1.com að það væri ekki hægt að bera getu bílanna saman fyrr en í fyrsta mótinu. Massa segir þó Red Bull bílinn fljótan í förum, þá hafi Nico Rosberg á Mercedes ekið hratt á sunnudag og ekki sé hægt að afskrifa McLaren og önnur lið. Bæði Massa og Fernando Alonso prófuðu allar gerðir af Pirelli dekkjunum sem voru í boði á æfingunum og með mismunandi bensínhleðslu um borð í Ferrari bílnum, þegar þeir óku. "Það er auðvelt að spá fyrir um það að það verði fleiri þjónustuhlé (í mótum) en síðustu ár. Dekkin slitna meira og það er ekki auðvelt að passa upp á dekkin. Gripið er gott, sérstaklega á mjúku dekkjunum, en miðútgáfan og þau harðari eru ekki góð hvað þetta varðar. Slitið er samt svipað. Það gætu orðið aðrar keppnisáætlanir en síðustu tímabil", sagði Massa. Fyrsta Formúlu 1 mót ársins verður í Ástralíu 27. mars, eftir að mótið í Barein var fellt út sem fyrsta mót ársins. Það átti að fara fram 13. mars.