Eitt ökumannssæti laust í Formúlu 1

Enn á eftir að ráða ökumann í eitt ökumannssæti í Formúlu 1 og það er hjá Hispania liðinu spænska. Indverjinn Narain Karthikeyan ekur einum bíl liðsins, en enginn hefur verið staðsfestur um borð í hinn bílinn. Á ráslínunni í Formúlu 1 í ár verða 24 ökumenn, sem keppa í 19 mótum í það minnsta, jafnvel 20 ef mótið í Barein verður sett á dagskrá síðar á árinu. Hispania liðið byrjaði að keppa í Formúlu 1 í fyrra, en var aftarlega á merinni hvað árangur varðar. Ítalinn Viantonio Liuzzi prófaði bíl liðsins á dögunum, en hann segist ekki vilja borga fyrir sætið, eins og virðist óbeint hafa verið raunin hjá Karthikeyan. Karthikeyan kom með auglýsingafé frá Tata fyrirtækinu indverska, en fyrsta Formúlu 1 mótið í Indlandi verður á þessu ári. "Ég kem með reynslu, hraða og geri mitt best. Ég myndi hjálpa sem mest ég mætti að finna kostendur, en ég get ekki borgað fyrir sætið", sagði Liuzzi m.a. í frétt á espnf1.com. Liuzzi sagði Hispania liðið vera í viðræðum við kostendur, en hann er í viðræðum við liðið og bíður ákvörðunar þess. Luizzi segir ekki víst að Hispania liðið verði sérlega samkeppnisfært, nýi bíllinn verði tilbúinn seint og fjárráð liðsins eru takmörkuð. Liuzzi segir liðið þó hafa áhugaverðar áætlanir og ef þær gangi eftir, þá yrði það af hinu góða.