Hrafn: Þetta er svolítið óraunverulegt

Hrafn Kristjánsson, þjálfari karla- og kvennaliðs KR í körfubolta, mun standa í ströngu á morgun er hann stýrir báðum liðum sínum í úrslitum bikarkeppninnar.

"Þetta er svolítið óraunverulegt enda hef ég ekki lent í þessu áður. Þetta verður gaman," sagði Hrafn en síðasti þjálfarinn hjá KR sem náði því að sigra með báðum liðum var Einar Bollason.

"Það var mikið afrek. Ég get samt ekki verið að hugsa of mikið um það heldur verð ég að einbeita mér að því að hafa bæði liðin tilbúin í slaginn. Ég hef trú á því að við getum unnið báða leikina," sagði Hrafn sem reiknar með erfiðum leikjum.

Hægt er að sjá viðtal Hans Steinars Bjarnasonar við Hrafn í heild sinni hér að ofan.