Hamilton stefnir á tvo titla

Lewis Hamilton hjá McLaren vann óvæntan sigur í dag, eftir afhroð Red Bull liðsins, en ökumennirnir Mark Webber og Sebastian Vettel óku hver á annan þegar þeir voru í fyrsta og öðru sæti. "Við börðumst af kappi við Red Bull og það var mjótt á munum. Við munum gera okkar til að vinna báða meistaratitlanna", sagði Hamilton eftir keppnina samkvæmt frétt á autosport.com. "Við höfum verið að elta Red Bull og það er mikið afrek að ná að keppa við þá. Liðin höfðu ólíkan styrkleika á þessari braut og við vissum ekki hvernig það myndi þróast. Við pressuðum þá og það er frábært að vinna tvöfalt." Hann sagði að gaman hefði verið að sjá slag Vettel og Webber sem endaði með ósköpum. "Þetta var eins og að horfa á þrívíddarmynd. Frábært og ég var í besta sætinu! Sebastian keyrir af öryggi, en hann komst innfyrir Mark, sem hélt línunni og gaf ekkert pláss. Það var engin ástæða fyrir Sebastian að beygja til hægri og þetta var óheppilegt fyrir þá, en heppilegt fyrir okkur", sagði Hamilton.