Ferguson: Útilokað að Rooney spili

Sir Alex Ferguson, stjóri Man. Utd, staðfesti endanlega nú áðan að það væri ekki nokkur möguleiki á því að Wayne Rooney spili gegn FC Bayern annað kvöld.

„Hann á enga möguleika á að spila. Hann hefur verið að taka miklum framförum, læknateymið hefur staðið sig frábærlega en ég er ekki tilbúinn að taka áhættu með leikmann sem er ekki 100 prósent tilbúinn í slaginn," sagði Ferguson.

Einhverjir breskir fjölmiðlar héldu því fram að Rooney hefði æft í leyni og Ferguson ætlaði að koma heiminum á óvart með því að láta hann spila. Stjórinn vill þó ekki útiloka að Rooney verði á bekknum.

„Ég geri ekki ráð fyrir því að hafa hann á bekknum en Rooney gæti allt eins talað mig til. Þetta er snúin staða."