Ævisaga Kalla Sighvats sett á ís

„Heimildaöflun gekk hægar en ég gerði ráð fyrir, kannski ætluðum við okkur um of að gera þetta á svona skömmum tíma," segir Jónatan Garðarsson.

Eins og Fréttablaðið greindi frá fyrr á þessu ári hugðist Jónatan skrifa ævisögu Karls J. Sighvatssonar, eins fremsta orgelleikara Íslands fyrr og síðar, sem lést langt fyrir aldur fram í bílslysi 1991 við Hellisheiði. Karl var einn af meðlimum ofurgrúppunnar Trúbrots og lifði ansi merkilegu lífi.

Jónatan segir að hann hafi allt eins átt von á þessum töfum, hann hafi verið upptekinn við önnur verkefni og því ekki komist jafnfljótt í verkefnið og hann hafði vonast eftir. Aðrir hlutir hafi einnig komið til, Sigurjón Sighvatsson, bróðir Karls, var til að mynda upptekinn við tökur á kvikmyndinni The Killer Elite í Ástralíu allt sumarið. „Þannig að þetta tafðist eðlilega. Ég var samt búinn að tala við yfir hundrað manns og það tekur drjúga stund. Við vildum því ekki láta einhverja tímapressu fella verkið."

Jónatan var engu síður búinn að skrifa mestalla bókina en það átti eftir að gera lagfæringar, myndvinna hana og brjóta hana um. Spurður hvort bókin komi þá út á næsta ári segir Jónatan vonast til þess.

„Okkur fannst allavega skynsamlegt að staldra við núna og sjá hvað setur. Það er einfaldlega undir útgefandanum komið hvað verður, hvort bókin komi út á næsta ári eða ekki." - fgg