Theódór Elmar átti þátt í öllum fjórum mörkum IFK í kvöld

Theódór Elmar Bjarnason átti flottan leik með IFK Gautaborg í sænsku úrvalsdeildinni í fótbolta í kvöld og var maðurinn á bak við 4-0 sigur liðsins á meisturunum í AIK. Theódór skoraði eitt mark og átti þátt í hinum þremur mörkum IFK.

Theódór Elmar skoraði fjórða mark IFK í leiknum á 72. mínútu leiksins en hann lék allan leikinn í þriggja manna framlínu liðsins. Theódór Elmar átti einnig glæslegt sláarskot þar sem frákastið skapaði eitt marka Gautaborgarliðsins.

Ragnar Sigurðsson og Hjálmar Jónsson spiluðu einnig allan tímann hjá IFK og voru saman í miðvarðarstöðunum. Þetta var aðeins þriðji sigurleikur liðsins á tímabilinu en liðið er í 11. sæti með 12 stig út úr fyrstu 11 leikjunum.