Jose Mourinho: Chelsea hefði átt að halda mér

Jose Mourinho, stjóri Inter, nýtir sér fjölmiðlaathyglina fyrir Meistaradeildarleikinn á móti Chelsea, til að kynda undir sálfræðistríðið fyrir leikinn. Chelsea hefur aðeins unnið einn bikar á þeim tveimur árum sem eru liðin frá því að Mourinho var rekinn úr Brúnni.

„Chelsea hefðu átt að halda mér ef félagið ætlaði að vinna fleiri titla. Chelsea hefur átt bágt síðustu tvö ár og það er engin tilviljun að liðið hafi gefið eftir í kjölfar þess að ég fór," segir Jose Mourinho.

„Ég, leikmennirnir og stuðningsmennirnir áttum einstakt samband og þegar slíkt er brotið upp verður það ekki lagað svo auðveldlega," segir Mourinho.

„Síðan ég fór hefur liðið verið með fjölda stjóra og sumir þeirra höfðu kannski ekki rétta skapgerð fyrir starfið. Þeir reyndu jafnvel að breyta of miklu af því sem var í lagi undir minni stjórn," segir Mourinho.