Anna Mjöll hitti George Clooney og frú á Honululu

„Hann er ákaflega viðkunnalegur og maður skilur núna af hverju hann er svona vinsæll. Hann er svo þægilegur í viðmóti að hann lætur öllum líða eins og þeir hafi þekkt hann alla ævi," segir söngkonan Anna Mjöll Ólafsdóttir en hún hitti stórstjörnuna George Clooney á veitingastað á Honululu á Hawaií. Clooney var þar ásamt unnustu sinni, ítölsku sjónvarpskonunni Elizabettu Canalis, en sá orðrómur hafði gengið í slúðurpressunni að þau væru hætt saman. Svo virtist ekki vera, allavega ekki þetta kvöld. Clooney er skærasta kvikmyndastjarna heims um þesar mundir en hann hlaut Óskarsverðlaun fyrir leik sinn í bandarísku kvikmyndinni Syriana.

Anna sat til borðs með manni að nafni Cal Wortington en sá er hálfgerð goðsögn í bandarískum skemmtanaiðnaði. „Cal þekkti þá Frank Sinatra, Dean Martin og Gary Grant persónulega en þetta eru þeir einstaklingar sem Clooney lítur hvað mest upp til. Hann spratt því á fætur þegar hann kom auga á Cal og greip í hendina á honum, ætlaði hreinlega ekki að sleppa af honum takinu," útskýrir Anna en hún var þarna í nokkurra daga fríi ásamt vinafólki sínu.

Anna segir að frægðin stígi Clooney greinilega ekki til höfuðs því hann og Canalis voru klædd eins og hver annar túristi en leikarinn er staddur á Hawaíi til að leika í kvikmyndinni The Descendants.„Þau voru bara bæði voðlega sæt og Elizabetta tók myndina af okkur," útskýrir Anna en Clooney var ekkert síður upprifinn yfir því að hitta áðurnefndan Cal.

Clooney er hins vegar ekki fyrsti heimsfrægi einstaklingurinn sem Anna Mjöll rekst á því söngkonan varð þess heiðurs aðnjótandi að hitta látna poppgoðið Michael Jackson á búgarði hans Neverland árið 1993. Þá keyrði söngkonan um þennan fræga garð með Jackson í golfbíl og skoðaði þennan skrýtna garð.

„Hann virtist vera ofboðslega einmana. Manni fannst hann vera aleinn í heiminum," sagði Anna Mjöll um kynni sín af Jackson en hið sama virtist ekki vera uppá teninginum hjá George Clooney.

freyrgigja@frettabladid.is