Chinatown valin best

Chinatown frá árinu 1974 hefur verið valin besta kvikmynd allra tíma af gagnrýnendum bresku blaðanna Guardian og Observer.

Jack Nicholson festi sig í sessi sem einn besti leikarinn af sinni kynslóð í myndinni, sem var sú síðasta sem Roman Polanski leikstýrði áður en hann flúði frá Bandaríkjunum.

Myndin var tilnefnd til ellefu Óskarsverðlauna og hlaut ein, fyrir besta handritið. Saman í öðru sæti í kosningunni lentu Psycho eftir Alfred Hitchcock og Andrei Rublev eftir Andrei Tarkovsky. Annie Hall eftir Woody Allen tók fjórða sætið og 2001: A Space Odyssey eftir Stanley Kubrick það fimmta.