Moratti: Mourinho er ógleymanlegur

Massimo Moratti, forseti Evrópumeistara Inter, vonast enn til að Jose Mourinho verði áfram knatspyrnustjóri félagsins þó svo að allar líkur séu á að hann sé á leið til Real Madrid.

Inter vann þrennuna undir stjórn Mourinho á tímabilinu sem lauk í gær með 2-0 sigri á Bayern München í úrslitaleik Meistaradeildar Evrópu í Madrídarborg.

„Við munum ræða saman fljótlega. Mourinho fór aftur með liðinu til Mílanó en ég tel ekki að hann sé búinn að semja við annað félag því hann er alvörugefinn maður," sagði Moratti við ítalska fjölmiðla.

„Það getur vel verið að hann hafi rætt við eitthvert lið en ég tel að það sé enn svigrúm til að sannfæra hann um að skipta um skoðun. Ég er engu að síður þakklátur Mourinho því hann hefur gert okkur kleift að vinna marga sigra."

„Mourinho er einstakur og ógleymanlegur. Það er enginn sem hefur sömu hæfileika og hann," sagði Moratti. „En ef einhver kemur í hans stað ætti sá hinn sami ekki að reyna að herma eftir honum heldur fara eigin leiðir."