Frakkinn Franck Ribery hefur bæst í Bayern-kórinn þar sem leikmenn þýska liðsins tala stanslaust um það að ensku meistararnir í Manchester United standi og falli með einum manni - Wayne Rooney.
Wayne Rooney hefur skorað 33 mörk í öllum keppnum á tímabilinu og hefur verið í frábæru formi en hann skoraði tvennu í báðum leikjunum á móti AC Milan í sextán liða úrslitunum.
„Rooney ber lið United á herðum sér og við verðum að passa okkur vel á honum," sagði Franck Ribery, eins helsta stjarna Bayern við The Sun. „Hann er búinn að eiga frábært tímabil og ég samgleðst honum því ég er mjög hrifinn af honum sem leikmanni," sagði Riberry.
„Hann er hungraður í árangur og hann fórnar sér fyrir liðið sitt. Hann tæklar, hann verst, hann sækir og hann skorar mörk. Hann er líka fullur sjálfstraust," sagði Riberry um Rooney.
„Heimurinn býst við að við töpum þessum leik en við eigum góðan möguleika. Við erum með nógu gott lið til að trúa því að við getum komist áfram," sagði Riberry.
Franck Ribery: Manchester United er eins manns lið
