Avatar II gerist úti á hafi

DVD-útgáfan af Avatar kemur út á morgun og menn eru þegar farnir að spá sölumetum í unnvörpum. Mestu athyglina vekur þó viðtal við leikstjóra myndarinnar, James Cameron, í LA Times en hann er þegar farinn að spá og spekúlera í framhaldsmyndinni.

„Við bjuggum til risastóran striga þar sem við getum komið umhverfi Pandora til skila,“ segir Cameron en fyrir þá örfáu sem ekki sáu Avatar er rétt að geta þess að Pandora er plánetan sem jarðarbúar reyna að hertaka.

Cameron heldur síðan áfram í viðtalinu að greina frá ýmsum þáttum framhaldsmyndarinnar og tekur fram að næsta mynd muni hafa allt annað yfirbragð en sú fyrsta. „Ég reikna með því að hún muni rannsaka lífríki sjávar á Pandora. Hafið verður álíka litskrúðugt, fjölbreytt og ævintýralegt en munurinn verður auðvitað sá að þarna verður regnskógurinn ekki í aðalhlutverki.“

Þetta er ekki í fyrsta skipti sem leikstjórinn gerir kvikmynd úti á ballarhafi. Titanic var auðvitað mestmegnis um risastórt fley sem sigldi á ísjaka og The Abyss gerðist að miklu leyti í undirdjúpunum.