Webber: Þurfti að hafa fyrir sigrinum

Mark Webber var ánægður með árangur dagsins í Formúlu 1 mótinu í Ungverjalandi. Hann vann sigur, eftir að Sebastian Vettel og Fernando Alonso náðu að veita honum keppni. Hann sneri á þá báða með vel útfærðri keppnisáætlum Red Bull liðsins, og refsingu sem Vettel fékk fyrir að brjóta reglur í kringum endurræsingu mótsins. "Þetta var einskonar gjöf til mín í dag. Ég hef ekki fengið margar en þigg hana með þökkum. Þetta var ólán hjá Sebastian", sagði Webber í frétt á autosport.com. Webber vann fjórða sigurinn á árinu. "Þetta er ótrúlegur dagur fyrir liðið. Markmið okkar var fyrsta og annað sætið, en því miður náðum við því ekki, en náðum fullt af stigum samt. Það er alltaf gott að hámarka árangurinn, sana hvað gerist hjá keppinautum okkar. Við förum ekki framúr okkur þó við höfum náð fleiri stigum en þeir sem voru á undan okkur." Webber átti ekki von á sigri fyrir mótið. "Sebastian var fremstur á ráslínu og leiddi mótið og án mistaka var mótið hans. En það gerist ýmislegt í kappakstri. Ég hef ekki fengið aðra sigra gefins. Sebastian tapaði tveimur sætum og við töpuðum stigum í keppni bílasmiða, en ég kvarta ekki. Ég þurfti að vinna mitt verk og það var ekki auðvelt", sagði Webber.