Ánægður með Íslendingana

Dermot Mulroney, aðalleikari Inhale, hrósar þeim Óttari Guðnasyni og Baltasar Kormáki fyrir vinnu þeirra. Myndin fær frábæra dóma í Hollywood Reporter.

Á meðan leikstjórinn Baltasar Kormákur og Óttar Guðnason sátu í stóra sal Háskólabíós með sínu fólki á sunnudagskvöld og horfðu á Inhale komu þau Dermot Mulroney og Diane Kruger, aðalleikarar myndarinnar, sér vel fyrir á einkaheimili í Beverly Hills og horfðu á myndina í ró og næði. Með þeim voru meðal annars framleiðendur Inhale, þær Jennifer Kelly og Nathalie Marciano.

Mulroney, þekktastur fyrir aukahlutverk í kvikmyndum á borð við My Best Friend‘s Wedding, About Schmidt og Zodiac, er í ítarlegum viðtölum við bæði Collider.com og Los Angeles Times og ræðir þar meðal annars samstarfið við Baltasar og Óttar og ekki síst mótleikara sinn, leikritaskáldið og goðsögnina Sam Shepard. Sem, ef marka má orð Mulroneys, er ekkert alltof auðveldur í samstarfi.

„Ég hef unnið nokkrum sinnum með Sam, lék meðal annars son hans í kvikmynd frá árinu 1986 og svo gerðum við aðra mynd tíu árum seinna og eitthvað í leikhúsi líka. Og ég get alveg sagt að Sam er aldrei neitt sérstaklega viðkunnanlegur og hann er frekar ógnandi við fyrstu kynni. Ég meina, Baltasar Kormákur, er mikill maður, myndarlegur með kraftmikla nærveru og jafnvel hann varð lítill við hliðina á Sam,“ segir Mulroney í samtali við Collider.

Mulroney hrósar hins vegar þeim Baltasar og Óttar Guðnasyni tökumanni fyrir þeirra vinnu í Los Angeles Times.

„Hvernig þeim tókst að breyta Las Vegas í mexíkóska bæinn Juarez var alveg ótrúlegt og það var skemmtilegt að vinna við mynd með íslenskum kvikmyndagerðarmönnum, þýskri aðalleikkonu, amerískum aðalleikara og frönskum og spænskum aukaleikurum,“ segir Mulroney í samtali við Los Angeles Times.

Inhale fær fjórar stjörnur í Fréttablaðinu í dag og gagnrýnandi Hollywood Reporter, Kirk Honeycutt, var einnig yfir sig hrifinn og nefnir sérstaklega: „stórkostlega frammistöðu Dermots Mulroney,“ eins og það er orðað.

Í niðurstöðu dómsins segir að Inhale sé vel skrifaður tryllir en áhorfendum gæti liðið illa vegna þeirra siðferðilegu spurninga um ólöglega líffærasölu sem kvikmyndin spyr.

freyrgigja@frettabladid.is