FCK óvænt úr leik í danska bikarnum

FCK tapaði sínum fyrsta leik á tímabilinu í annað hvort deild eða bikar í Danmörku er liðið tapaði óvænt á heimavelli fyrir Horsens, 4-2, í dönsku bikarkeppninni.

FCK hefur haft mikla yfirburði í dönsku deildinni í haust og er enn ósigrað eftir þrettán umferðir. Liðið er með fjórtán stiga forystu á næsta lið.

Liðið er þar að auki að gera fína hluti í Meistaradeild Evrópu og er liðið með sex stig eftir þrjá leiki í sínum riðli. FCK hefur aðeins tapað fyrir stórliði Barcelona.

Sölvi Geir Ottesen var í byrjunarliði FCK í fyrsta sinn í kvöld síðan hann handleggsbrotnaði um miðjan september.