Ronaldo vonast eftir afmælisgjöf frá spænsku aganefndinni

Cristiano Ronaldo, leikmaður Real Madrid og portúgalska landsliðsins, á 25 ára afmæli í dag og hann á sér óska afmælisgjöf frá aganefnd spænska knattspyrnusambandsins. Ronaldo vonast eftir því að fá leikbann sitt helmingað þannig að hann geti spilað með Real á móti Espanyol á morgun.

Cristiano Ronaldo fékk rautt spjald fyrir að nefbrjóta Malaga-manninn Patrick Mtiliga í leik liðanna á dögunum en hefur ávallt haldið því fram að hann hafi verið að losa sig. Brotið leit ekki vel út í sjónvarpi og Ronaldo var dæmdur í tveggja leikja bann.

Ronaldo var ekki með um síðustu helgi þegar Real Madrid vann 3-1 sigur á Deportivo La Coruna í spænsku úrvalsdeildinni.