Xavi verður ekki með Barcelona í kvöld á móti Stuttgart

Spænski landsliðsmiðjumaðurinn Xavi verður ekki með liðinu í kvöld í seinni leiknum á móti Stuttgart í sextán liða úrslitum Meistaradeildarinnar. Xavi er lykilmaður í spili Barcelona-liðsins og verður því örugglega sárt saknað í þessum mikilvæga leik.

Xavi meiddist í gær á kálfa á æfingu fyrir leikinn og verður væntanlega frá keppni næstu fimmtán dagana. Malíski miðjumaðurinn Seydou Keita er hinsvegar góður af sínum meiðslum og verður því með í kvöld.

Barcelona og Stuttgart gerðu 1-1 jafntefli í fyrri leiknum í Þýskalandi og eru spænsku Evrópumeistararnir í ágætum málum fyrir leikinn í kvöld.