Sao Paulo vill fá Kaká heim

Varaforseta brasilíska liðsins Sao Paulo, Carlos Augusto, dreymir um að fá landa sinn, Kaká, aftur til félagsins en Kaká hóf feril sinn hjá Sao Paulo.

José Mourinho, þjálfari Real Madrid, lét hafa eftir sér á dögunum að hann væri til í selja Kaká og það hefur heldur betur kveikt áhuga margra félaga.

"Það kemur mjög á óvart að Mourinho sé til í að sleppa honum. Auðvitað höfum við mikinn áhuga á því að fá hann heim en það er langt í að sá draumur verði að veruleika," sagði Augusto.

"Við höfum ekki enn gert tilboð í hann en það stendur til. Ég er viss um að stuðningsmenn félagsins myndu elska að fá Kaká heim."