Dýrindis klæði

Hönnuðirnir Þórey Björk Halldórsdóttir og Richard P. Foley munu opna vefverslunina Worn By Worship 10. desember. Verslunin mun selja íslenska og erlenda fatahönnun og renna tíu prósent af hverri seldri vöru til góðgerðamála.

„Richard fékk hugmyndina í hausinn fyrir ári og byrjaði að þróa hana hægt og rólega í kjölfarið. Við fórum svo að þróa hugmyndina í sameiningu fyrir svona þremur mánuðum og nú er afraksturinn loks að líta dagsins ljós,“ segir Þórey Björk.

Á meðal þeirra íslensku hönnuða sem taka þátt í verkefninu eru Royal Extreme, Sonja Bent, Shadow Creature, 8045 eftir Bóas og Mundi svo fáeinir séu nefndir.

Viðskiptavinurinn hefur um nokkra möguleika að velja þegar hann kaupir sér flík í gegnum vefverslunina og ræður því til hvaða málefnis fé hans rennur. Að sögn Þóreyjar verður aðeins íslensk hönnun fáanleg á síðunni þar til í byrjun næsta árs en þá munu þau Richard einbeita sér að því að fá bæði erlenda hönnuði og góðgerðastofnanir til liðs við sig.

„Með síðunni langaði okkur að vekja athygli almennings og hönnuða á góðum málefnum og á sama tíma fá hönnuði aðeins til að pæla í hvaðan hráefnin sem þeir nota koma og hvernig þau eru framleidd,“ segir Þórey.

Vefverslunin verður opnuð í byrjun desember en þangað til er hægt að fylgjast með verkefninu í gegnum Facebook.