Lehmann ekki búinn að gefast upp

Jens Lehmann, markvörður Stuttgart, hefur enn trú á því að Stuttgart geti komist í átta liða úrslit Meistaradeildarinnar þrátt fyrir að hafa aðeins náð 1-1 jafntefli á heimavelli í kvöld.

„Við náðum að skapa okkur fín færi en því miður gáfum við þeim ódýrt mark," sagði Lehmann.

„Okkar frammistaða var góð og auðvitað stendur Barcelona betur að vígi en miði er möguleiki. Barcelona er ekki lið sem spilar upp á 0-0 og því mun liðið koma fram á völlinn í seinni leiknum. Það gefur okkur möguleika."