Tónleikar með Metallica og Slayer í bíó í sumar

Hljómsveitirnar Metallica, Megadeth, Slayer og Anthrax koma fram á tónleikum í Búlgaríu í sumar. Tónleikarnir verða sýndir í beinni útsendingu víða um heim - meðal annars á Íslandi. Hljómar ótrúlega vel, segir þungarokksspekingurinn Haukur Viðar.

„Þetta hljómar kjánalega til að byrja með, en er það ekki vegna þess að þetta er óvenjulegt?" segir Haukur Viðar Alfreðsson, þungarokkssérfræðingur Fréttablaðsins.

Tónleikar hljómsveitanna Metallica, Megadeth, Slayer og Anthrax verða í beinni útsendingu í Sambíóunum 22. júní í sumar. Tónleikarnir fara fram í Sofiu, höfuðborg Búlgaríu og ferðast um gervihnött í bíóhús um allan heim. Haukur Viðar þekkir til hljómsveitanna betur en margir og ætlar ekki að láta sig vanta í sumar.

„Það er engin spurning. Svo þegar maður er orðinn gamall fara minningarnar að blekkja mann og maður heldur að maður hafi séð fullt af böndum á tónleikum," segir Haukur léttur í lundu. Hann efast þó um að þetta verði sama upplifun og að vera á staðnum, enda á tæknin eftir að slípa þungarokkið til. „Nú eru komnar digital-sýningar og svona þannig að hljómurinn verður fyrsta flokks. Þetta er örugglega eins að horfa á DVD í ógeðslega góðu heimabíói," segir Haukur.

„En þetta hljómar ótrúlega vel. Spurning hvort þetta gæti verið eitthvað fyrir bönd sem finnst ógeðslega leiðinlegt að túra. Að halda bara eina tónleika í heimaborg sinni og þá klára þeir heimstúrinn á einu kvöldi. Þetta er mjög þægilegt fyrir lata tónlistarmenn."

Hljómsveitirnar eru allar komnar til ára sinna, en samanlagður starfsaldur þeirra spannar yfir 110 ár. En í hvernig formi eru hljómsveitirnar þessa dagana?

„Ég er búinn að fylgjast með Metallica á túrnum," segir Haukur. „Þeir virðast vera í ágætisformi. Ég er ánægður með lögin sem þeir taka. Þeir eru duglegir við að taka alls konar lög og binda sig ekki við einhverja ímyndaða „greatest hits-plötu".

Haukur segir erfitt að festa fingur á form Megadeth, enda skiptir forsprakkinn Dave Mustaine reglulega um hljóðfæraleikara. Þá segir hann Slayer heimsþekkta fyrir að vera pottþétt, en Anthrax þykir honum ekki hafa elst eins vel og hinar hljómsveitirnar þrjár og sparar ekki stóru orðin: „Mér finnst Anthrax ógeðslega hallærislegt band."

atlifannar@frettabladid.is