McLaren klúðraði titli á innanhúsdeilum

Staðan á milli ökumanna Red Bull liðsins hefur vakið athygli, þar sem Mark Webber taldi sér mismunað í mótinu á Silverstone um helgina varðandi búnað og taldi hann að Sebastian Vettel hefði verið tekinn framyrir sig. Webber svaraði þessu með sigri á Silverstone. Christian Horner sem ákvað að Vettel skyldi fá framvæng undan bíl Webbers segir að málin verði rædd á fundi í dag og Webber á von á því að hægt verði að milda stöðuna á milli sín, liðsins og Vettels. Webber var mjög ósáttur um helgina við framgang mála. Martin Whitmarsh hjá McLaren segist ekki vita hvað er í gangi hjá Red Bull, en hann þekkir vel deilur innanhús, þar sem allt fór í hund og kött milli Lewis Hamilton og Fernando Alonso árið 2007. Þeir voru í mikilli samkeppni og McLaren stjórarnir réðu ekki almennilega við ástandið. "Menn verða að taka ákvarðanir af vel athugðu máli. Ökumenn eru miklir keppnismenn, annars væri þeir ekki í þessu starfi. Ef þeim sýnist eitthvað misjafnt í gangi, þá ávísun á vandræði", sagði Whitmarsh í frétt á autosport.com. "Það er alltaf spenna á milli liðsfélaga sem eru að berjast um meistaratitilinn. Við höfum upplifað það nokkrum sinnum, en tel okkur sinna sllíkum málum vel í dag." Ökumenn McLaren, Hamilton og Jenson Button eru í tveimur efstu sætunum í stigamóti ökumanna, eftir mótið á Silverstone um helgina. "Árið 2007 var okkur erfitt. Við vorum með góðan bíl og að reyna vinna meistaratitilinn, en töpuðum með eins stigs mun. Hamagangurinn innan liðsins kostuðu okkur titilinn og við skiljum og virðum það. En í dag þá erum við með góða blöndu ökumanna, bíls og liðs, þannig að við erum í forystu í báðum stigamótum", sagði Whitmarsh.