Lán veitt í gegnum Lúxemborg til að draga úr gagnsæi

Þá er einnig ljóst að Landsbankinn í Lúxemborg hafi að umtalsverðu leyti verið notaður til þess að fjármagna starfsemi fyrirtækja Björgólfs Thors Björgólfssonar. Sérstaklega athyglisvert er að stór hluti þessara skuldbindinga verði til rétt fyrir fall bankans.

Bankinn hafi í miklum mæli veitt lán með ábyrgð Landsbankans á Íslandi og var bankaleyndin í Lúxemborg einn hvatinn á bak við slíkar lánveitingar. Að mati rannsóknarnefndarinnar verði ekki annað séð en að í mörgum tilvikum hafi verið um að ræða lán frá Landsbanka Íslands til íslenskra aðila sem afgreidd hafi verið í gegnum Landsbankann í Lúxemborg í þeim tilgangi að draga úr gagnsæi.