Játaði fyrir rétti

Breski popparinn George Michael hefur viðurkennt fyrir rétti að hafa ekið Range Rover-bifreið sinni inn í verslun undir áhrifum kannabisefna. Hann játaði einnig að hafa haft í fórum sínum kannabissígarettur til eigin nota.

Atvikið átti sér stað snemma morguns 4. júlí. Bíllinn var enn í gangi þegar lögreglan kom á vettvang og þegar hún ætlaði að handsama hinn 47 ára Michael ætlaði hann að aka af stað. Yfirheyrslan yfir popparanum tók fimmtán mínútur og játaði hann afbrot sín.

Þetta er ekki í fyrsta sinn sem Michael kemst í kast við lögin en oftast nær hafa eiturlyf komið þar við sögu. Ekki hefur verið ákveðið hvenær verður dæmt í máli hans.