Hamilton vill brúa bilið í þá fljótustu

Formúlu 1 ökumenn fengu kærkomna hvíld í vikunni eftir nokkuð annasamar vikur frá upphafi tímabilsins í mars. Þeir keppa í næstu viku í Barcelona á Spáni og Lewis Hamilton býst við framförum hjá McLaren liðinu. "Við verðum með nokkuð stórar endurbætur á bílnum. Það var hinsvegar barnalegt að halda að þær geri okkur að hástökkvurum, því nánast öll lið munu mæta með endurbættar yfirbyggingar til Barcelona. Ég er bjartsýnn á að þær brúi bilið í bílanna fyrir framan", sagði Hamilton í liðsfréttum McLaren á vefsíðu autosport.com. "Við höfum sannað að við erum mjög góðir í að þróa bílanna á keppnistímabilinu og ég vona því að við verðum í góðum málum í Barcelona", sagði Hamilton, en í fyrra byrjaði McLaren með heldur slakan bíl, en óx ásmeginn. Jenson Button hjá McLaren hefur nú forystu í stigakeppni ökumanna á undan Nico Rosberg, Fernando Alonso og Hamilton kemur þar á eftir. Hamilton er 11 stigum á eftir Button, en vegna nýrrar stigagjafar þá er það mjög lítill munur og fjöldi ökumanna á raunhæfa möguleika á titilslag þegar mótin í Evrópu byrja um aðra helgi með mótinu á Spáni. "Ef það verður þurrt, þá verður erfiðara fyrir okkur að vera meðal þeirra fremstu. Við munum leggja alla áherslu á tímatökuna, þar sem það er alltaf erfitt að komast framúr á brautinni. Ég geri ráð fyrir að keppendur taki aðeins eitt þjónustuhlé og því er enn mikilvægara en ella að ná góðum stað á ráslínu", sagði Hamilton.