Benzema kynntur stuðningsmönnum Real á morgun

Real Madrid hefur tilkynnt að framherjinn Karim Benzema sem keyptur var félagsins frá Lyon á 30 milljónir punda muni verða kynntur fyrir stuðningsmönnum á Bernabeu-leikvanginum annað kvöld.

75 þúsund manns komu til þess að hylla Portúgalann Cristiano Ronaldo á mánudag og í kringum 55 þúsund manns buðu Brasilíumanninn Kaka velkominn þar á undan en Spánverjinn Raúl Albiol varð að láta sér 8 þúsund manns gott heita.

Það kemur í ljós hversu margir taka á móti Frakkanum unga annað kvöld en Madridingar hefja æfingar á föstudag og mæta svo Shamrock Rovers í fyrsta æfingarleik fyrir komandi tímabil í Dublin á Írlandi á mánudag.

Búist er við að bæði Benzema og Ronaldo spili leikinn en Kaka og Albiol fá lengra frí vegna þátttöku þeirra í Álfukeppninni í síðasta mánuði.