Lengsti dómur níu og hálft ár

Smyglmálið fyrir austan leiðir hugann að Pólstjörnumálinu svokallaða sem kom upp árið 2007. Sex sakborningar voru dæmdir hér á landi og einn í Færeyjum. Lengsta dóminn hlaut Einar Jökull Einarsson, níu og hálfs árs fangelsi fyrir að skipuleggja innflutninginn.

Fimmtudaginn 20. september gerði lögreglan áhlaup á skútuna Pólstjörnuna þar sem hún lá við bryggju á Fáskrúðsfirði. Menn í bíl í grenndinni voru einnig handteknir. Í ljós kom að í skútunni voru tæp 40 kíló af fíkniefnum.

Sex sakborningar hlutu samtals 32 ára fangelsi hér á landi. Guðbjarni Traustason hlaut sjö og hálfs árs dóm, Alvar Óskarsson sjö ára, Marínó Einar Árnason fimm og hálfs árs fangelsi og Bjarni Hrafnkelsson átján mánuði. Sjötti sakborningurinn var dæmdur í eins árs skilorðsbundið fangelsi.

Auk sexmenninganna var Birgir Páll Marteinsson dæmdur í sjö ára fangelsi í Færeyjum. Hann situr nú á Litla-Hrauni.