Vonar að tapið kveiki í KR fyrir úrslitaleikinn

Benedikt Guðmundsson þjálfari KR segir stemminguna í herbúðum liðsins mjög góða þrátt fyrir að það hafi tapað sínum fyrsta og eina leik í vetur í Grindavík á mánudagskvöldið.

Vísir náði tali af Benedikt þegar hann kom af æfingu í kvöld og spurði hann út í tapið í Grindavík og bikarúrslitaleikinn við Stjörnuna á sunnudaginn kemur.

"Við erum ekkert að gráta það þó einn leikur tapist. Auðvitað mættum við í leikinn gegn Grindavík til að vinna, en við vorum bara að spila við sterkt lið á útivelli og þeir voru sterkari þetta kvöldið," sagði Benedikt.

Hann á von á því að tapleikurinn á mánudaginn verði til að kveikja í hans mönnum og gera þá enn ákveðnari í að vinna bikarinn um helgina.

"Ég lít samt þannig á það að þetta sé ekkert svakalega slæmt, því þetta heldur mönnum á tánum og nú fæ ég mína menn væntanlega froðufellandi í úrslitaleikinn í bikarnum á sunnudaginn. Ég hafði verið smá áhyggjur af því að ná að gíra menn upp fyrir úrslitaleikinn, en ég fann það á æfingu núna í kvöld að þetta tap herti menn bara upp og kveikti í þeim," sagði þjálfarinn.

"Það er fyrir öllu að tapa ekki bikarleikjum, því maður kvittar ekkert fyrir það. Ég er mjög ánægður að það var ekki bikarleikur sem við vorum að tapa, því það hefði verið mjög slæmt að vera taplausir í allan þennan tíma en detta svo út úr bikar. Það var því mjög gott að ná að klára Grindavík í bikarnum um daginn. Við getum alltaf bætt fyrir þetta tap í deildinni og við dettum ekkert í þunglyndi þó við töpum einum leik" sagði Benedikt.

Það er Stjarnan sem verður mótherji KR í úrslitaleiknum á sunnudaginn og ljóst að Garðbæingar eru sýnd veiði en ekki gefin. Liðið hefur verið á mjög góðu skriði síðan Teitur Örlygsson tók við stjórnartaumunum og Benedikt á von á hörkuleik.

"Við erum auðvitað að fara að mæta hörkuliði sem hefur unnið sjö af síðustu átta leikjum. Stjarnan hefur verið að sýna það núna eftir áramót að það er mikil stemming hjá þeim og þeir eru með mjög gott lið."