Góðærið skrifað út úr Dubbeldusch

„Við urðum að snúa þessu aðeins við, annað hefði bara verið kjánalegt," segir leikstjórinn og leikritaskáldið Björn Hlynur Haraldsson. Leikverkið Dubbeldusch er komið til Hafnarfjarðar eftir mikla sigurför fyrir norðan en hefur tekið stakkaskiptum síðan það var frumsýnt í mars á síðasta ári. Þá lék nefnilega allt í lyndi og enginn, ekki einu sinni ráðamenn, höfðu hugmynd um hvað væri handan við hornið. „Bönkunum hefur verið breytt og við getum ekkert verið minni menn og breytum verkinu, þetta er nýtt Dubbeldusch fyrir Nýja Ísland," útskýrir Björn Hlynur.

Breytingarnar felast aðallega í umhverfinu, í staðinn fyrir glæsibifreiðar eru komnir eldri kaggar, gorgeirinn hefur breyst í hógværð og sumarbústaðurinn sem leikritið gerist í er ekki fullbúinn heldur þakinn byggingarplasti. „Við breyttum líka tóninum í samtölunum og það má eiginlega segja að áður hafi þetta verið fjölskylda í krísu í miðju góðæri en nú er þetta fjölskylda í krísu í kreppu." Leikritaskáldið áréttar þó að söguþráðurinn sé sami, handritið sé einfaldlega hráefni sem hægt sé að matbúa á þann hátt sem hver og einn kjósi. „Mér finnst þetta reyndar mjög skemmtilegt, að notast við handritið á þennan máta og væri alveg til í að gera meira af þessu."

Verkefnastaðan hjá Birni er þéttskipuð. Hann hefur tekið við af Ólafi Agli Egilssyni við gerð kvikmyndahandrits eftir sögu Hreins Vilhjálmssonar, Bæjarins verstu, sem Vesturport hyggst kvikmynda þegar fram líða stundir. „Og svo er eitt og hálft leikrit sem ég geng með í maganum," bætir Björn við.- fgg