Forlan: Chelsea er besta liðið í enska boltanum

Úrúgvæinn Diego Forlan, leikmaður Atletico Madrid, segir að Chelsea sé með besta liðið í ensku úrvalsdeildinni í dag en Atletico mætir einmitt Chelsea í Meistaradeildinni í kvöld.

„Chelsea hefur mun meiri gæði í sínu liði og er mun hættulegra lið en það var þegar ég var að spila í enska boltanum," sagði Forlan.

„Fyrir mér er Chelsea besta liðið í deildinni. Tilkoma Ancelotti hefur styrkt varnarleikinn og gert þá enn betri í sókninni. Ancelotti hefur virkilega kveikt á Drogba, Ballack og Anelka. Það er gott fyrir okkur að Drogba sé ekki með núna."