Löggur lemja löggur

Búist er við að mikill mannfjöldi steðji til Danmerkur þegar loftslagsráðstefna Sameinuðu þjóðanna verður haldin þar í desember.

Það verða ekki aðeins ráðstefnugestir heldur einnig ýmsir hópar mótmælenda úr öllum heimshornum. Oftar en ekki kemur til óeirða á svona stórfundum og danska lögreglan er þegar byrjuð að búa sig undir slaginn.

Þar eru menn á látlausum æfingum sem eru svo raunverulegar að flytja hefur þurft marga lögregluþjóna á sjúkrahús.

Lögreglumönnum er skipt í tvo hópa. Annar hópurinn og sjá fjölmennari leikur mótmælendur og í hinum hópnum eru svo löggur sem leika sjálfa sig.

Meðal þeirra sem þurfti að flytja á sjúkrahús var lögreglukona sem var slegin í bakið með kylfu þegar hún neitaði að hlýða skipun um að setjast í götuna.

Viðbrögð þjálfunarstjórans voru blendin. -Það á náttúrlega ekki að hrósa lögreglumönnum fyrir að slá með kylfu, en höggið var flott. Þetta var alveg eftir kúnstarinnar reglum. Þvert yfir hrygginn.

Í öðru tilfelli var lögreglumanni skipað að beita kylfunni. Hann var svo ákafur að þegar hann reiddi bareflið til höggs lenti það á enni næsta lögreglumanns fyrir aftan hann. Hann steinlá.

Það er harkan sex, hjá dönsku lögreglunni.